ಮಿ||ಬಕರ

"ಎಲ್ಲಾ ಬಿಟ್ಟ ಮಗ ಬಂಗಿನೆಟ್ಟ" ಅನ್ನೋ ಹಾಗೆ ಫಿನಾನ್ಸಿಯಲ್ ಇನ್ಫ್ಲೇಷನ್ ನಿಂದ ಕೆಲಸ ಕಳಕೊಂಡು ಸರ್ಕಸ್ ಕಂಪನಿ ಸೇರಿಕೊಂಡ ಅಂದುಕೊಂಡಿರ? ಅಲ್ಲ ಮೇಲಿನ ಫೋಟೊ ಸರ್ಕಸ್ ನೊಡಲು ಹೊಗಿ ಜೊಕರ್ ಗಳಿಂದ ಬಕರಾ ಆಗಿದ್ದು.
ಜೀವನದಲ್ಲಿ ಇಲ್ಲಿಯ ವರೆಗೆ ಬೇರೆಯವರಿಗೆ ತರಾವರೀ ತಮಾಷೆಯ ಟೋಪಿ ಹಾಕುತ್ತಿದ್ದ ನಾನು ಖತಾರ್ ಗೆ ಬಂದು ಬಣ್ಣ ಬಣ್ಣದ ಟೋಪಿ ಹಾಕಿಸಿಕೊಂಡ ಕಥೆ ಹೇಳುವ ಮೊದಲು ನಾ ಹಾಕಿದ ತರಾವರಿ ಟೋಪಿಗಳ ಬಗ್ಗೆ ಹೇಳಬೇಕಾಗಿದೆ.ಈ ಹಿಂದೆ ಹುಚ್ಚು ಕೋಳಿ ಮನಸು ಬ್ಲೊಗ್ ನಲ್ಲಿ ಬರೆದಂತೆ ನಾ ಫೋನ್ ಮಾಡಿ ಜನರನ್ನ ಬಕರ ಮಾಡಿದ್ದು ಲೆಕ್ಕವಿಲ್ಲ. ಮಳಯಾಳಿ ಪೀಟರ್ ನ ಹಾಗೆ ಮಾತನಾಡಿ ಒಬ್ಬರನ್ನ,ಚಿಟ್ಟಾಣಿ ಅಜ್ಜನ ಸ್ವರ ತೆಗೆದು ಒಬ್ಬರನ್ನ, ಕೋಟ ಶಿವಾನಂದನಾಗಿ ಇನ್ನೊಬ್ಬರನ್ನ,ಹೋಂಡ ಶೋರೂಂ ನವನ ಸ್ವರದಲ್ಲಿ ಇನ್ನೊಬ್ಬರನ್ನ, ಹೀಗೆ ಪಟ್ಟಿ ಬೆಳೆಯುತ್ತದೆ. ಆದರೆ ಕಾಲಚಕ್ರ ತಿರುಗಿ ನಾನು 25 ಜನರ ಕಿಕ್ಕಿರಿದ ಜನಸ್ತೋಮದ ಮದ್ಯೆ ಕುರಿ ಆಗಲು ಬಹಳ ದಿನ ಹಿಡಿಯಲೇ ಇಲ್ಲ.

ನಡೆದದ್ದು ಇಷ್ಟೆ......... ಮೊನ್ನೆ ಗುರುವಾರ ಕತಾರ್ ನ ಹಯಾತ್ ಪ್ಲಾಝಾ ದಲ್ಲಿ ರಶ್ಯನ್ ತಂಡದವರಿಂದ ಸರ್ಕಸ್ ಇದೆ ಎಂದು ತಿಳಿದು ಬಂತು ಶುಕ್ರವಾರ ವಾರದ ರಜ ಆಗಿದ್ದರಿಂದ ರಾತ್ರಿ 8 ಗಂಟೆಯ ಶೋ ಗೆ ಹೋಗಿ ಕುಳಿತೆವು ರಶ್ಯನ್ ಸುಂದರಿಯರು ಸೂರಿನಿಂದ ಇಳಿಬಿಟ್ಟ ಬಟ್ಟೆಗೆ ಜೋತುಬಿದ್ದು ಅದನ್ನ ಮೈಮೇಲೆ ಸುತ್ತಿಕೊಳ್ಳುತ್ತಾ ಮೇಲೆ ಹೋಗಿ ಒಮ್ಮೆಲೇ ಹಗ್ಗವನ್ನ ಬಿಟ್ಟು ತಿರುಗುತ್ತಾ ನೆಲದ ಹತ್ತಿರದ ವರೆಗೂ ಬಂದು ನಮ್ಮ ಎದೆಯನ್ನ ಝಲ್ ಎನಿಸುತ್ತಾ ತಮ್ಮ ಸುಂದರ ಬಳುಕುವ ಸಿಂಹಕಟಿ ಯಿಂದ ನಾನಾರೀತಿಯ ಸರ್ಕಸ್ ಮಾಡುತ್ತಾ ನಮ್ಮನ್ನ ಮೈಮರೆಯುವಂತೆ ಮಾಡಿದ್ದರು. ಈ ತನ್ಮದ್ಯೆ ಅವರು ಮುಂದಿನ item ಗೆ ತಾಯಾರಾಗುವ ವರೆಗೆ ಜೋಕರಿ ಗಳಿಬ್ಬರು ಬಂದು ತಮ್ಮ ಚೇಷ್ಟೆ ಗಳಿಂದ ನಮ್ಮನ್ನು ತಾರಕದಲ್ಲಿ ನಗುವಂತೆ ಮಾಡುತ್ತಿದ್ದರು.ಮದ್ಯೆ ಮದ್ಯೆ ಪ್ರೇಕ್ಷಕರ ಬದಿಯಿಂದ ಮಕ್ಕಳನ್ನ ಕರೆದು ಅವರಿಟ್ಟಿಗೆ ಮ್ಯಾಜಿಕ್ ಗಳನ್ನ ಮಾಡಿ ರಂಜಿಸುತ್ತಿದ್ದರು.
ಅದರಲ್ಲಿ ಒಂದು ಹಗ್ಗ ಎಳೆದು ಹಿಡಿಯುವ Item ಗೆ ಸ್ವಲ್ಪ ದೊಡ್ದವರನ್ನ ಬಲಿಷ್ಟರನ್ನ ಕರೆದರು ಸಭೆಯ ಮದ್ಯದಿಂದ ಒಬ್ಬ ಅರಬ್ಬಿ ಬಂದು ನಿಂತ ಇನ್ನೊಂದು ಕಡೆ ಹಗ್ಗ ಹಿಡಿಯಲು ಯಾರೂ ಹೋಗಲು ತಯಾರಾಗದ್ದರಿಂದ ಅನಿವಾರ್ಯವಾಗಿ ನಾನು ಹೋಗಿ ನಿಲ್ಲಬೇಕಾಯಿತು. ಮೊದಲೇ ಬಲಿಷ್ಟರನ್ನ ಕರೆಯುತ್ತಿದ್ದಾರೆ ಅಲ್ಲದೇ ಎದುರು ಬದಿ ನಿಂತವ ದನತಿನ್ನುವ ಧಡೂತಿ ಅರಬ್ಬಿ ನಾನು ತಡೆದೇನಾ ಎಂದ ಅನುಮಾನದಿಂದಲೇ ಹೊಗಿ ಹಗ್ಗಹಿಡಿದದ್ದಾಯಿತು.ನಮ್ಮನ್ನ ಹಗ್ಗ ಎಳೆದು ಹಿಡಿಯುವಂತೆ ಹೇಳಿದ ಜೋಕರಿಗಳಿಗೆ ನಮ್ಮ ಶಕ್ತಿ ಸಾಲದು ಎನಿಸಿತೋ ಏನೋ ಎಂಬಂತೆ ನಟಿಸಿ ಇನ್ನಿಬ್ಬರನ್ನ ಕರೆದರು ಆಗ ಒಂದು ಕಡೆಯಿಂದ ಶ್ಯಾಮ ಬಂದು ನಿಂತ ನನ್ನ ಬದಿ ಒಬ್ಬ ನೇಪಾಳಿಯನ್ನ ಎಳೆತಂದಾಯಿತು.
ನಮ್ಮ ನಾಲ್ಕೂ ಜನರನ್ನ ಹಗ್ಗ ಎಳಿಯುವಂತೆ ಹೇಳಿ ಅದರ ಮೇಲೆ ಹತ್ತಲು ಪ್ರಯತ್ನಿಸುವಂತೆ ನಟಿಸಿ ನಮ್ಮ ಗಮನ ನಮ್ಮ ಹಗ್ಗದ ಹಿಡಿತದ ಮೇಲೆ ಗಮನ ಇಡುವಂತೆ ಮಾಡಿ ಒಳಗಿದ್ದ ಇನ್ನೊಬ್ಬಳು ಜೋಕರಿಯನ್ನ ಕರೆದಳು. ನಾವು ಮುಖ ಸಿಂಡಿರಿಸಿ ಮೈಯ ಶಕ್ತಿಯನ್ನೆಲ್ಲ ಒಟ್ಟಿಗೇ ಸೇರಿಸಿ ಹಗ್ಗ ಎಳೆದು ಹಿಡಿದಿದ್ದರೆ ಒಳಗಿಂದ ಬಂದವಳು ಬಕೇಟ್ ನಲ್ಲಿ ತಂದಿದ್ದ ಎರಡು ಬಟ್ಟೆಗಳನ್ನ ಹಗ್ಗದ ಮೇಲೆ ಒಣಗಿಸಿ ಅದಕ್ಕೆ ಕ್ಲಿಪ್ ಹಾಕಿ ನಮ್ಮನ್ನ ನೋಡಿ ಶುಕ್ರಾನ್ ಎಂದು ಬಿಡುವುದೇ?
ಹಿಂದೊಮ್ಮೆ ಇದೇ ರೀತಿ ನನ್ನ ಸ್ನೇಹಿತನೊಬ್ಬ ಅವನ ಮಿತ್ರನ ಫೋನ್ ನಿಂದ ಒಂದು prerecorded ಹೆಣ್ಣಿನ ಧ್ವನಿಯನ್ನ ಹಾಕಿ ನನ್ನನ್ನ ಪೆಗ್ಗು ಬೀಳಿಸಿದ್ದ.ಅವತ್ತು ಬೆಳಿಗ್ಗೆ ಆಫೀಸಿಗೆ ಹೊಗುವ ಗಡಿಬಿಡಿಯಲ್ಲಿ ತಿಂಡಿ ತಿನ್ನುತ್ತಿದ್ದ ನಾನು ಕಾಲ್ ಬಂದ ತಕ್ಷಣ ಸ್ಪೀಕರ್ ಫೋನ್ ಆನ್ ಮಾಡಿ ಮೇಜಿನ ಮೇಲಿಟ್ಟೆ.ಆ ಕಡೆಯಿಂದ ಹೇಗಿದ್ದೀರ ಏನು ನನ್ನ ಮರೆತೇಬಿಟ್ಟಿರಾ ಎಂದೆಲ್ಲಾ ಮಾತನಾಡ ತೊಡಗಿದಾಗ ಅಮ್ಮ ನನ್ನನ್ನ ಅಪಾರಾಧಿಯಂತೆ ಗುರಾಯಿಸುತ್ತಿದ್ದಳು. ಅವತ್ತು ಅಮ್ಮನ ಎದುರು ನನ್ನ ಅವಸ್ಥೆ ಯಾರಿಗೂ ಬೇಡದ ಸ್ಥಿತಿ ತಲಿಪಿತ್ತು.
ನನ್ನಿಂದ ಬಕರಾ ಆದ ಯಾರ ಶಾಪವೋ ಏನೋ ನಾನೂ ಆಗಾಗ ನಾಮ ಬಳಿದ ಕುರಿಯಾಗುತ್ತೇನೆ.
ಹೀಗೆ ಸಾವಿರಾರು ಬಕರಾ ಮಾಡುವ strategy ಗಳು ನನ್ನಲ್ಲೇ ಇದ್ದರೂ, TV ಗಳಲ್ಲಿ ಇಂಥಹಾ ನೂರಾರು ಸನ್ನಿವೇಶಗಳನ್ನ ನೋಡಿದ್ದರೂ ಆ ಕ್ಷಣದಲ್ಲಿ ಏನೂ ತೋಚದೇ ಬಕರಾ ಅಗಿದ್ದನ್ನ ಪ್ರಾಮಾಣಿಕ ವಾಗಿ ಒಪ್ಪಿಕೊಳ್ಳಬೇಕು.
(ಬೇರೆಯವರಿಂದ ಗೊತ್ತಾದರೆ ಹೋಗುವ ಮರ್ಯಾದೆಯ ಪ್ರಮಾಣ ಹಚ್ಚು ಆದ್ದರಿಂದ ನಾನೇ ಮೊದಲು ಹೇಳಿಕೊಂಡು ಬಿಟ್ಟಿದ್ದೇನೆ ಹಿ ಹಿ ಹಿ)